ലഹരിവിപത്തിനെ ചെറുക്കാൻ എല്ലാ വിഭാഗം ജനങ്ങളെയും വിവിധ വകുപ്പുകളെയും സ്ഥാപനങ്ങളെയും ഏകോപിപ്പിച്ച് അതിശക്തമായ ക്യാമ്പയിന് നേതൃത്വം നൽകാൻ സർക്കാർ. നിലവിലുള്ള എല്ലാ ക്യാമ്പയിനുകളും സംയോജിപ്പിച്ച് ഏപ്രിൽ മുതൽ അതിവിപുല ലഹരി വിരുദ്ധ ക്യാമ്പയിനാണ് നടപ്പാക്കുക.
ഈ മാസം 30 ന് വിദഗ്ധരുടെയും വിദ്യാര്ത്ഥി-യുവജന സംഘടനകളുടെയും സിനിമ-സാംസ്കാരിക-മാധ്യമ മേഖലകളിലെ സംഘടനകളുടെയും അധ്യാപക-രക്ഷാകര്തൃ സംഘടനകളുടെയും യോഗം ചേര്ന്ന് കര്മ്മപദ്ധതി തയാറാക്കും. 
ചീഫ് സെക്രട്ടറിയുടെ നേതൃത്വത്തില് ലഹരിവിരുദ്ധ രൂപരേഖ തയാറാക്കാനായി വിവിധ വകുപ്പുകള് ചേര്ന്ന സമിതി രൂപീകരിക്കും. എല്.പി ക്ലാസുകള് മുതല് തന്നെ ലഹരിവിരുദ്ധ ബോധവത്ക്കരണം തുടങ്ങും. കുട്ടികളെ കായിക രംഗത്ത് ആകര്ഷിക്കാന് കൂടുതല് പരിപാടികള് സംഘടിപ്പിക്കും. ഹോസ്റ്റലുകളും പൊതുഇടങ്ങളും ലഹരിമുക്തമാണെന്ന് ഉറപ്പാക്കാനുള്ള നടപടികളും പരിശോധനയും കര്ശനമാക്കും. പോലീസിന്റെയും എക്സൈസിന്റെയും എന്ഫോഴ്സ്മെന്റ് പ്രവര്ത്തനങ്ങള് കൂടുതല് വ്യാപിപ്പിക്കും.
ലഹരിവില്പന നടത്തുന്ന കടകള് അടച്ചുപൂട്ടുന്നതിനുള്ള നടപടി തദ്ദേശസ്വയംഭരണ വകുപ്പ് കൈക്കൊള്ളും. മയക്കുമരുന്ന് സാന്നിധ്യം കണ്ടെത്താനുള്ള ആധുനിക ഉപകരണങ്ങള് വാങ്ങാൻ നിർദ്ദേശം നൽകി. സ്നിഫര് ഡോഗ് സാന്നിധ്യം വര്ദ്ധിപ്പിക്കും. ആവശ്യമെങ്കില് മറ്റു സംസ്ഥാനങ്ങളിലെ പോലീസ് ഉദ്യോഗസ്ഥരുമായി ബന്ധപ്പെട്ട് നടപടികളിലേക്കു നീങ്ങും.
ഓൺലൈൻ ലഹരി വ്യാപാരം തടയാനുള്ള നടപടികൾ ശക്തമാക്കും. എയർപോർട്ട്, റെയിൽവേ, തുറമുഖം എന്നിവ കേന്ദ്രീകരിച്ച് പരിശോധന വർധിപ്പിക്കും. അതിര്ത്തികളിലെ പോലീസ് പരിശോധന ശക്തമാക്കും.
കൊറിയറുകള്, പാഴ്സലുകള്, ടൂറിസ്റ്റ് വാഹനങ്ങള് തുടങ്ങി കേരളത്തിന്റെ അതിര്ത്തിയിലേക്ക് കടന്നുവരുന്ന വാഹനങ്ങള് പരിശോധനയ്ക്ക് വിധേയമാക്കും.
മയക്കുമരുന്നിനെതിരായ കാമ്പയിൻ്റെ ഭാഗമായി നിയമസഭാ മന്ദിരത്തിൽ ചേർന്ന ഉന്നതതല യോഗത്തിലാണ് നടപടികൾക്ക് മുഖ്യമന്ത്രി പിണറായി വിജയൻ നിർദ്ദേശം നൽകിയത്.
0 Comments
Readers, please exercise caution when using information from this website. Verify facts from multiple sources and be aware that not all content online is reliable. We do not endorse false information or harmful content and reserve the right to moderate and remove inappropriate comments. Your safety matters.